كشف الممثل ومساعد المخرج الشاب إبراهيم أشرف، في تصريحات عن مشاركته بشخصية إبراهيم في مسلسل الحشاشين، الذى يعرض خلال دراما رمضان 2024، ومن إخراج دكتور بيتر ميمى، وبطولة النجم كريم عبد العزيز.
وصرح أشرف قائلاً: “اختارنى دكتور بيتر ميمى، وخيرى سالم اللى كان بيساعدنا شوية في الأول، واسمه مكتوب على التتر شكر خاص على وجوده معانا في العمل، علشان أقدم شخصية إبراهيم، والحقيقة أنا طالع باسمى وشخصيتى في المسلسل، وده كان طلب الدكتور بيتر منى”.
وتابع أشرف قائلاً: “الشخصية أصلاً مكنتش موجودة في الورق، بس دكتور بيتر حس أنها هتضيف للسياق الدرامى، واتكلم مع المؤلف عبد الرحيم كمال وزود الشخصية، اللى ساعدنى فيها كتير دكتور بيتر، لأنى أوقات كتير كنت بتوتر وببقى خايف، بس هو دايمًا كان بيقولى خليك طبيعى انا عايز شخصيتك زى ما هي طيب وبيهزر”.
وتابع أشرف قائلاً: “وبصراحة كان أحمد جمال المخرج المنفذ مع حاتم متولى المساعد الأول، ووليد سالم اسكربت حركة بيساعدونى لما بيبقى عندى تصوير وبيعملوا شغلى بما انى مساعد مخرج في المسلسل، فعلشان كده كنت قادر اوفق بين الاتنين”.
وأنهى أشرف تصريحاته: “اسمى اتكتب على التتر مساعد مخرج وممثل شاب، ودى حاجة اكيد بستطتنى انى كنت مشارك فى مسلسل مهم ومتميز زى الحشاشين، وعن حلقة معركة الليل، كنت مشارك فيها ممثل ومخرج، وكنت فى الوقت اللى مش قدام الكاميرا ورا الكاميرا بساعد فى حركة المجاميع، والـ Stunt، لحد ما الدكتور يجى ويرسم الحركة هتمشى ازاى ونراجعها مع الناس اكتر من مرة”.
![](https://i.ibb.co/ysRksrQ/181095-2.webp)
يعرض مسلسل الحشاشين الحلقة 15، بطولة النجم كريم عبد العزيز على قناة DMC الساعة 9:15 مساء ويعاد الساعة 1:45 صباحًا والساعة 4:15 مساء، وعلى قناة DMC دراما الساعة 11 مساء والإعادة الساعة 6.30 صباحًا والساعة 1.30 مساء، إضافة إلى عرضه بالتزامن مع عرضه على منصة Watch it الساعة 9.15 مساء، وذلك ضمن مسلسلات رمضان 2024.
مسلسل الحشاشين من بطولة كريم عبد العزيز، فتحى عبد الوهاب، نيقولا معوض، ميرنا نور الدين، أحمد عيد، إسلام جمال، محمد رضوان، سامى الشيخ، عمر الشناوى، نور إيهاب، سوزان نجم الدين، ياسر علي ماهر، بسنت أبو باشا وعدد كبير من الفنانين، وضيوف الشرف، وهو من تأليف عبد الرحيم كمال، وإخراج بيتر ميمى، وإنتاج شركة سينرجى.